Мардан Төлебек: "Үздік үштік үшін таласуға дайынбыз"

– «Ордабасы» биылғы біріншілікті өте жақсы бастады. Оған оқу-жаттығу жиындары да себеп болған шығар? Команданың жаңа маусымда алға қойған мақсаты қандай?

– Біз Түркияның Анталия қаласында үш оқу-жаттығу жиынын өткіздік. Күніне екі мезгіл жаттықтық. Бірнеше жолдастық кездесу өткіздік. Менің ойымша, биылғы чемпионатта үздік үштік үшін таласуға дайынбыз.

– «Астана» соңғы үш жылда чемпиондықты уысынан шығарар емес. Осы жылы да олардың тек бірінші орын үшін ойнайтындары белгілі. Биыл астаналықтардан бөлек алтынға кімдер таласады деп ойлайсыз?

– Иә. Дұрыс айтасыз. «Астана» қатарынан үшінші жыл чемпион болып келе жатыр. Өте мықты команда. Үш жыл бойы чемпиондыққа лайық команда болды. Биыл чемпиондыққа «Астана», «Қайрат», «Ордабасы» және «Ақтөбе» таласады деп ойлаймын.

– «Ордабасы» құрамына жаңадан бірнеше ойыншының қосылғанын білеміз. Олар жайлы не айта аласыз? Жаңа футболшылар өздерін көрсете алды ма?

– Барлық жаңадан келген ойыншылар бізге өз көмектерін тигізеді деп үміттенеміз. Жаттығуларда, ойындарда бұл футболшылар тырысып, өздерін жақсы жағынан көрсетіп жатыр. Алла қаласа, жеңістеріміз алда деп үміттенеміз.

– Шымкент футболының түлегісіз. Ел өзіңізді «Ордабасының» төл футболшысы ретінде таниды. Дегенмен, алдағы уақытта клуб ауыстыру жоспарыңызда бар ма?

– Клуб ауыстыру жоспарда жоқ. «Ордабасымен» үш жылға келісім-шартқа қол қойдым. Әзірге, ойымның барлығы сол. «Ордабасыммен» үздік үштікке кірсек деген ниетім бар.

– Десек те,  маусымаралық үзіліс кезінде басқа командалардан ұсыныс болған шығар?

– Маусымаралық үзілісте ұсыныстар болды. Бірақ клуб басшылары да, жанкүйерлер де, жанұям мен достарым да «Ордабасы» клубында қалғанымды қалады. Өзімнің де қалауым сол.

– Рахмет. Алдағы ойындарда сәттілік тілейміз.

– Рахмет.

Нұршапағат Несіпбаев