Адам Навалка: "Екінші таймның басында Қазақстан құрамасы жүйкемізді жұқартты"
– Нәтижеге қарамастан, ойын өте ауыр өтті. Тактикалық, физикалық арпалыс болды. Польша құрамасы Даниядан кейінгі нашар жағдайдан сенім тауып, бүгін үмітті ақтап берді. Ең бастысы - толық үш ұпайды алдық. Біз жанкүйерлер алдында еңсемізді тіктеп қалдық.
– Құрама командада кім керемет ойнады? Кімді ерекше мақтап өтер едіңіз?
– Ойынның алдында бірнеше нұсқа болды. Бірнеше футболшыны алмастырып тастағым келген. Алаңға шығатын ойыншыны дәл таңдау деген ең қиын шаруа. Ең бастысы олар алаңда 100 пайыз ойнады. Барлығы мен үшін сәтті өтті. Біздің негізгі мақсатымыз - болашақтың командасын жасау. Қазірден бастап жастарды араластырып көріп, үйлесімді команда жасағым келеді.
– Сіздің командаңыздың екінші таймның басын нашар ойнауының себебі неде? Менсінбеушілік болған секілді көрініп қалды. Себебі, Қазақстан құрамасы допқа көбірек иелік етіп, шабуылдар ұйымдастыра бастады.
– Біз босаңсып қалдық деп айта алмаймын. Кішкене допты жоғалтқанымыз - бұл әр ойында болатын жағдай. Түгел 90 минут шапқылай берудің де қажеті шамалы. Ең бастысы - біз жеңіске жеттік. Қазақстан құрамасын да мақтай кеткім келеді. Олар өте жақсы ойнады.
– Қазақстаннан кейін Сіздерді тағы да мықты құрамалар күтіп тұр. Қандай жоспарыңыз бар?
– Қазан айында бізді маңызды екі ойын күтіп тұр. Ең бастысы - біз бүгін жеңіске жеттік те, өз-өзімізге сенімділік алдық. Ең әдемі, нәтижелі ойынымызды жалғастыра берсек, діттегенімізге жетеміз. Дания мен Черногория құрамалары да осал емес. Олар да өз ойынын жеңіп келе жатыр. Сол құрамаларға қарсы соңғы күшімізді сарп етуіміз керек.
– Аркадиуш Миликтің құрамаға қайта келгені халықты қуантты. Арменияға қарсы ойыннан кейін бірінші рет екі шабуылшы стилінде ойнадыңыздар. Алдағы уақытта да солай бола бере ме?
– Иә, біз енді екі шабуылшымен ойнай алатын жағдайға жеттік. Аркадиуш Милик пен Роберт Левандовски бір-бірін жақсы түсінеді. 1 немесе 2 шабуылшымен ойнай алатын жағдайымыз бар. Бұл таңдаудың өзі бізді күшейте түсетіні анық.
Ермұхамед МӘУЛЕН
| № | Команда | И | М | О |
|---|---|---|---|---|
| 1 | Астана | 3 | 6-1 | 7 |
| 2 | Ордабасы | 3 | 6-2 | 7 |
| 3 | Оқжетпес | 3 | 6-3 | 7 |
| 4 | Қайрат | 3 | 2-0 | 7 |
| 5 | Елімай | 3 | 6-3 | 5 |
| 6 | Қызылжар | 3 | 4-4 | 4 |
| 7 | Ұлытау | 3 | 2-2 | 4 |
| 8 | Ертіс | 3 | 5-5 | 3 |
| 9 | Атырау | 3 | 1-1 | 3 |
| 10 | Ақтөбе | 3 | 5-6 | 3 |
| 11 | Алтай | 3 | 1-2 | 2 |
| 12 | Жеңіс | 3 | 1-3 | 2 |
| 13 | Қайсар | 3 | 1-3 | 2 |
| 14 | Жетісу | 3 | 3-6 | 2 |
| 15 | Каспий | 3 | 2-5 | 1 |
| 16 | Тобыл | 3 | 3-8 | 1 |
