Қыздарымыз Уэльстен оңбай ұтылды

Шымкенттегі "БИІК" стадионында өткен кездесуде біздің бұрымдылар 0:4 есебімен жеңілді. Матчтағы бірінші голды 15-ші минутта Кейли Грин салса, 23-ші минутта 28 жастағы шабуылшы екінші голды соқты. 

Ал, кездесудің екінші таймында Қазақстан құрамасы мүлде қиын жағдайда қалды. 59-шы минутта Бегайым Қырғызбаева алаңнан қуылып, қарсыласқа пенальти сыйлады. Айып добын Хэлен Лендер мүлт жібермей, есепті еселей түсті. Матч аяқталар тұста біздің қақпағы тағы да бір айып соққысы белгіленді. Бұл жолы да 29 жастағы шабуылшы гол соғып, матчтың нүктесін қойды. 

Осылайша, 8-ші топта 6 ойын өткізген Қазақстан құрамасы турнир кестесінің соңғы орнында тұр. Еншімізде тек екі ғана ұпай бар. Біздің топта ұпайдан шашау шығармай келе жатқан Норвегия құрамасы бірінші орында. Оларда 12 ұпай бар. Екінші орында Австрия құрамасының қыздары орналасқан. Австрия аруларының да еншісінде 12 ұпай бар. Бірақ, олар бір ойын артық өткізген. Үздік үштікті Уэльс құрамасы түйіндеп тұр. Джейн Ладлоу шәкірттерінің еншісінде жеті ұпай. 

Енді Қазақстан құрамасы 2 маусым күні Израиль құрамасын қабылдайды. Бұл ойына да Шымкентте өтеді. 

Қазақстан – Уэльс 0:4 (0:2)

Голдар: Грин 15, 23, Ландер – пенальти 60, пенальти 81

Ескерту алғандар: Красюкова 26, Бабшук 55, Кәрібаева 62, Шойкина 80, Чиверс 89

Алаңнан қуылған ойыншы: Қырғызбаева 59 

Қазақстан: Мәдина Шойкина, Мәдина Жаңатаева, Бегайым Қырғызбаева, Екатерина Красюкова, Мария Ялова (Кәмила Құлмағамбетова 88), Сәуле Кәрібаева (Ксения Хайрулина 64), Светлана Бортникова, Юлия Николаенко, Екатерина Бабшук, Әйгерім Әйтімова, Екатерина Пяткина.

Уэльс: Лаура О'Салливан (Клэр Скиннер 90+1), Рейчел Роув, Наташа Хардинг, Ангарад Джеймс, Софи Ингл, Лорен Дайкс, Кейли Грин (Клои Чиверс 87), Джессика Фишлок, Хелен Ландер, Надя Лоуренс (Хейли Лэдд 77), Рианнон Робертс.

Төрешілер: Тания Фернандес (Люксембург), Беренжер Пиерар (Бельгия), Джолин Делкруа (Бельгия).