Футфристайлдан Қазақстан ашық чемпионаты өтті
Теңбіл допты шыр көбелек айналдыруға қазақ балаларының да шамасы жетеді. Оған футбол фристайлынан Алматыда өткен үшінші ашық Қазақстан чемпионатында көз жеткіздік. Аяқдоп өнерінің жарысында 20-дан астам сайыскер бас жүлде үшін таласты.
«Футбол фристайлы» дегеніміз - дененің әрбір мүшесін пайдалану арқылы ала допты шыр көбелек айналдыру. Әдетте, турнирлер үш тәртіп бойынша өтеді. Біріншісі, эйр мувз - допты жерге түсірмей әуеде ұстап түрлі қимылдар жасау болса, ситтингтің ерекшелігі қатысушылар доппен жерде отырып өнер көрсетуге мүмкіндік алады. Ал, граунд стайлға келетін болсақ, оның артықшылығы фристайл мен кәдімгі футболды біріктіреді. Яғни, спортшы допты жерде өзінен ұзатпай түрлі трюктер жасап алып жүреді.
Алматыдағы жарысқа қайта оралсақ. Турнирге жас ерекшеліктеріне қарамастан қатысуға ниет білдірген үміткерлердің барлығына мүмкіндік берілді. Олар диаметрі жеті метр болатын сайыс алаңқайында сынға түсті. Ал, олардың өнерін белгілі «Қайрат» командасының аңызға айналған ойыншылары мен эстрада жұлдыздарынан жасақталған қазылар алқасы әділ бағаларын беріп отырды.
Іріктеу кезеңінен сүрінбей өткен, жартылай финалда барын салған ақтөбелік Нұрсейіт Досмағамбет пен Алмат Қырғызбай ақтық сында өзара мықтыны анықтады. Нәтижесінде, допты шыр көбелекше айналдырағн Нұрсейіт еліміздің екі дүркін үздік футбол фристайлшысы атанса, астаналық спортшы екінші орынға жайғасты. Ал, үздік үштікті ресейлік Никита Аксинин түйіндеді.
Жарыс қорытындысы бойынша, жеңімпаздар мен жүлдегерлерге медальдар мен дипломдар табысталды. Ал, жанкүйерлерге тамаша көңіл-күй тарту еткен футфристайлшылар келесі турнирде жолыққанша деп үмітпен тарқасты.
| № | Команда | И | М | О |
|---|---|---|---|---|
| 1 | Қайрат | 6 | 9-1 | 14 |
| 2 | Ордабасы | 6 | 10-5 | 12 |
| 3 | Елімай | 6 | 10-5 | 12 |
| 4 | Қызылжар | 6 | 9-4 | 11 |
| 5 | Оқжетпес | 6 | 10-7 | 11 |
| 6 | Ұлытау | 6 | 7-5 | 11 |
| 7 | Астана | 6 | 9-8 | 9 |
| 8 | Жетісу | 6 | 6-8 | 8 |
| 9 | Атырау | 6 | 4-3 | 7 |
| 10 | Ақтөбе | 6 | 7-8 | 7 |
| 11 | Ертіс | 6 | 8-9 | 6 |
| 12 | Жеңіс | 6 | 3-8 | 6 |
| 13 | Қайсар | 6 | 2-6 | 4 |
| 14 | Алтай | 6 | 3-6 | 3 |
| 15 | Тобыл | 6 | 5-12 | 2 |
| 16 | Каспий | 6 | 2-9 | 1 |
