Нұрбол Жұмасқалиев: "Огайдың орнынан кеткеніне таң қалып тұрмын"

— Дмитрий Алексеевичтің орнынан кеткеніне таң қалып тұрмын. Мен бұл жаңалықты таңертең клуб басшыларынан естідім. Енді бапкерлік тізгінді кім ұстайтынын да білмеймін. Қазір жаттығуға бара жатырмыз. Дайындықты кім өткізетіні белгісіз. Жасырын емес, "Тобыл" биыл чемпионатты сәтсіз бастады. Оның үстіне кеше Қазақстан Кубогы бәсекесінен шығып қалдық. Басшылар осыны алға тартып, бапкерді қызметінен босатқан шығар. Бірақ, дөп басып айта алмаймын. Менің ойымша, Дмитрий Огайға тағы шамалы уақыт беру керек еді. 

— Дмитрий Алексеевичтің орнын кім басуы мүмкін?

— Бұл сауалға мен жауап бере алмаймын. Басшылардан сұрасаңыздар дұрыс болады. Қазір жаттығуды кім өткізетінін білмей тұрмыз. Бұл жаңалыққа мен ғана емес, барлық жігіттер таң қалып отыр. Барлығы бір-біріне хабарласып, "не болды?" деп сұрастырып жатыр. Қазір жаттығуда басшылар түсіндіріп беретін шығар.

— Расында, "Тобыл" биылғы чемпионатты сәтсіз бастады. Бұған не себеп? Барлық айыпты бірден бапкердің мойнына артуға болады ма?

— Бұл жерде бүкіл кінәні бапкерге таққан дұрыс емес деп ойлаймын. Турнир кестесіне қарасаңыздар, басқа клубтардың жағдайы бізден де нашар. Иә, "Тобыл" биыл үздіктердің қатарына қосылу керек. Сол үшін бізге көп назар аударылады. Дегенмен, қазіргі жағдайда бір адамды айыптаған орынды емес. Кей ойындарда бізге сәттілік жетіспеді, кей ойындарда жігіттер мүмкіндікті мүлт жіберіп жатты. Алайда, біз бірінші алтылықта тұрмыз. Мүмкін, басшылардың ойлағаны бұл емес шығар. Сол үшін де Дмитрий Алексеевичті қызметтен босатуы мүмкін.