Абат Айымбетов: "Тобылмен" өтетін әрбір ойын біз үшін оңайға соқпайды"

- Біз жеңіске жеткеніміз үшін өте қуаныштымыз. Ойын жайлы айтар болсақ – ойын біз ойлағандай өтті. Бірақ бірінші таймда ойын онша жүре қоймады. Қарсылас команда қарымта шабуылды жақсы өрбіте білді. Соның кесірінен өз қақпамызға гол соқтырып алдық. Алайда тез арада есімізді жиып, ойын тізгінін өз қолымызға ала бастадық. Соның арқасында аз уақыттың ішінде екі гол соқтық. Матч соңында жылдам қарымта шабуылдың арқасында үшінші голды соғып, ойын нүктесін әдемі қойдық. «Тобылмен» өтетін әрбір ойын біз үшін оңайға соқпайды. Бұрыннан бітіспес қарсылас екендігіміз белгілі. Кезінде «эль-классико» атанып кеткен текетіресте жеңіске жету біз үшін өте маңызды.

- Сен ойынға өте сәтті шықтың. Алаңға шыға сала белсенді қимылдап, Пиззеллиге ұрымтал тұста голдық пас бердің. Сол сәтте сен құлап бара жатып, пас берген едің, пасың жететініне сенімді болдың ба? Эпизодты тарқатып айтып берсең?

- «Тобыл» ойыншылары шабуылға шығып, біз қорғанысқа қайтқанбыз, сол кезде біздің жігіттер алға қарай доп тепкен, мен жылдам ұшқан допқа бірінші жетіп, Маркостың аяғына салып бердім. Өзімнің пасыма да, Пиццаның мүлт кетпейтініне де 100 % сенімді болдым (күліп).

-Қостанайлық команда ойын барысында позициялық шабуылдарға жиі шығып тұрды, «ақ-қызылдар» қорғанысқа көңіл бөле ойнады. Бұл бапкердің қойып берген тактикасы ма, әлде қарсылас осылай ойнауға мәжбүрледі ме?

- «Тобыл» өте мықты команда. Ол еліміздегі кез-келген командаға лайықты қарсылық көрсете алады. Олар бізді солай ойнауға мәжбүрледі деп айтсам болады. Бірақ біздің бапкерлік штаб дер кезінде ойын барысына өзгеріс енгізіп отырды. Соның арқасында жеңіске жеттік деп ойлаймын.

"Ақтөбе" ФК