"Қайратқа" жаңа стадион қажет пе?

Негізі бұл сауалға келгенде мамандардың да, қарапайым жанкүйерлердің де ойы екіге бөлінеді. Бірі иә десе, енді бірі жоқ, қажет емес дейді. Біз де осы екі тараппен жазуды жөн көріп отырмыз.

Иә, керек

Маусым басында «Қайрат» клубының өкілдері стадионда жөндеу жұмыстарын өткізген еді. Бесінші турға дейін алматылық клуб сырт алаңдарда ойнады. Соның кесірінен де болар, маусымды сылбыр бастады. Ол кезде стадионның көгалы ауыстырылып, стадионның бұқаралық құралдарға арналған жерлері, командалардың киініп-шешінетін бөлмелері жөнделген болатын. Қазір жасыл желектің мықты төселгенін көріп жүрміз. Еліміздегі ең бір сапалы төселген көгалдардың бірегейі десек қате болмас. Сонымен қатар, БАҚ өкілдеріне арналған жерлер жұмыс істеуге оңтайлы болып тұр.

Осы жөндеу жұмыстарынан кейін стадионға күрделі жөндеу жұмыстары керек екеніне көзің жетеді. Себебі, жалпы Қазақстанда әлі заманауи талаптардың барлығына сай келетін стадион жоқ. Егер, Алматыдағы стадион күрделі жөндеу жұмыстарынан өтетін болса, ұлттық құрама ойындарын қайта оңтүстік астанада өткізуге мүмкін болар еді. Бұл негізі ұлттық құрама үшін де ыңғайлы. Астанада құрама команда жаттығатын мықты база жоқ. Жаңа стадион клуб жанкүйерлері үшін де қолайлы болады. Мысалы, өткен жылы Еуропа лигасында стадионға сыймай, маңайлап жүрген жанкүйерлерді көрген едік. Сол олқылықтың орны толар еді. «Қайрат» командасының жанкүйерлер қатарын арттырып, шет елдік жанкүйерлерді де тартуға мүмкіндік туады. Одан бөлек, Қазақстанның халықаралық дәрежедегі турнирлерді ақырындап қабылдап, тәжірибие жинауға себебі болады.

Жоқ, қажет емес

Алматының Орталық стадионында күрделі жөндеу жұмыстарын өткізуге қарсылық білдірушілер жетерлік. Әсіресе, егде жастағы жанкүйерлер стадионның осы қалпында қалуын қалап отыр. Өйткені, Орталық стадион қаланың өткен ғасырдан бері сақталып келе жатқан көрікті жерлерінің бірі. Сондай-ақ стадионды бұзуға жеңіл атлеттер қарсы шықты. Дегенмен, бұл мәселе шешімін тапты. Қайрат Боранбаев жеңіл атлетика федерациясының президентімен кездесіп, жаңа стадион соғылса, бірінші кезекте атлеттердің мүддесі қарастырылатыны айтты.

Жаңа стадионды 30 мың жанкүйерге арнап соғатыны белгілі. Бірақ, дәл қазіргі қазақ футболының дамуымен стадионға мұнша жанкүйер тарту мүмкін болмай тұр. Әрине, «Қайрат» еліміздегі медиа бөлімі дамыған клубтардың бірі. Дегенмен, соның өзінде «Қайрат» ара-тұра жанкүйерді стадионға лық толтырмаса, ел біріншілігіндегі ойындарда толтыра алмайтыны белгілі.

Түйін

Міне, қазір жаңа стадионға байланысты жанкүйерлер арасында тартыс біз айтқан бес-алты тақырыптың айналасында жүреді. Бұл сұрақтың басын енді клуб басшылары ашып беретін шығар. Оның үстіне биыл қалалық әкімшілік клубқа стадионның 30 пайыз басқаруын берді. Мұның әзі де негізі әжептеуір жеңілдік. Өйткені, бұған дейін клуб стадионды жалға алуға жылына 1,2 миллион доллар жұмсайтын. Енді қалған ақшаны жөндеу жұмыстарына жұмсауға болады.

Керек – дерек

Алматының Орталық Стадионы 1958 жылы ресми түрде ашылып, осы уақытқа дейін футбол, жеңіл атлетика және т.б спорт түрлерінен бәсекелерді өткізіп келеді. Соңғы мәрте стадионда жөндеу жұмыстары 2010-11 жылдары жүргізілген болатын. Қазіргі уақытта стадион құшағына 23 804 жанкүйерді сыйдыра алады.

Орталық стадионда «Қайрат» клубы өз алаңдарындағы матчтарын өткізеді. «Астана-Арена» стадионы ашылғанға дейін футолдан Қазақстан ұлттық құрамасы да кездесулерін осы стадионда өткізетін еді.

Уалихан ҚОСАНБАЙ