Еркектің екі сөйлегені – өлгені! Бірақ, Васильевке бәрібір ...

Олай деуге директордың өзі итермеледі. Осыдан шамамен үш апта бұрын Дмитрий Пантелеевич "Twitter " әлеуметтік желсіндегі парақшасында – «Соңғы ойындарымыз үшін ұятты болып тұрмын. Кешіріңіздер! Неге бұлай болып жатқанын білмеймін. Егер венгрлерді өте алмасақ, арыз жазып қызметімнен кетемін. Командаға қысым көрсетпеулеріңізді сұраймын. Қолдаңыздар!», - деп жазба қалдырған еді.

Екі ойынның қорытындысы бойынша «Ақтөбе» Еуропа лигасының бірінші айналымында Венгрияның МТК клубынан әрі өте алмады. Өз алаңында Юрий Уткульбаев шәкірттері қарсыластарымен 1:1 есебімен итжығыс түссе, түзде 0:2 есебімен тізе бүкіті. Жалпы есеп 1:3, ары қарай МТК өтті.

Клубтың келесі кезеңге өте алмағанынан кейін қазақ футболы жанашырларының көкейіне жоғарыдағы жазба сап ете қалды. «Уәде Құдай сөзі» деген бар. Бірақ, Дмитрий Пантелеевич әлі уәдесінде тұрған жоқ.

Ойын аяқтала салысымен ол кісіден шағымды ешкім сұраған жоқ. Әйтсе де, ойынның ертесінде уақыт бар еді. Оның үстіне директор мырза Ақтөбеде болды. Бір жапырақ қағазға арызды жазу бес-ақ минут. Сол арызды жазу негізі Дмитрий Васильевтің ойында да жоқ-ау.

Жығылған сүрінгенге күледі деуші ма еді? Дмитрий Васильев қазір уәдені шетке жиып қойып, өзге команданы айыптауға көшті. Мысалы, бірер күн бұрын облыстық телеарналардың бірінде «11+» деген бағдарлама болды. Қонақ ретінде Дмитрий Васильев келген. Бағдарламада ол өзінің командасының жағдайы жайлы емес, «Оқжетпес» командасының проблемасын тізіп отыр. Бұл нәрсе ол үшін не қажеті бар? Қазақ футболына қатты жүрегі ауыратын азамат болса, «Ақтөбені» қазіргі жағдайдан құтқармайды ма?

«Ақтөбе» Еуропа лигасынан шығып кеткеніне қарамастан, Васильев қызметінен кетпейді. Бұл бұған дейін шешіліп қойған мәселе екен. Командаға жақын адамдар солай дейді. Бір кетсе, Васильев тек команда бірінші алтылыққа кіре алмаса жылы орнын босатады.

Біздің бұл материалды жазғандағы мақсатымыз – «Ақтөбені» жерге тығу емес еді. Ол қолымыздан да келмейді. Біздің мақсат – бұрынғы дүркіреп тұрған ұжымды көру. Шыны керек, сағындық. 

Қазір команданың ішкі атмосферасы да мықты емес. Кезінде Бадло, Логвиненко секілді жігіттер бір сөзімен команданы жинай білген еді. Рас, қазір Самат Смаков бар. Бірақ, жарақат алып қалғаннан кейін капитанды тыңдайтындар азайыпты. Бізге жеткен мәліметтер бойынша, әлеуметтік желіде тым белсенді болып кеткені үшін Смаковқа да айыппұл тағылыпты. Қазір капитан да ауызына құм құйып алды. Ал, команданың басқа футболшыларына хабарласып, сұқбат алайық десек, ат-тонын ала қашады. Басшылар сұқбат бермеу туралы ескертпе жасапты.

Қазір жұрт «Ақтөбеден» көп өзгерістер күтіп жүр. Біз де. Айрандай ұйып отырған команданың мұнша қауқарсыз күйге түскеніне кім кінәлі? Осыны білгіміз келеді. Егер, Дмитрий Васильев болса, қызметінен кетсін! Уәдесінде тұрсын! Әй, бірақ, қайдам. Біздің «Еркектің екі сөйлегені – өлгені» дейтін мақалымызды ол кісі білмейтін де шығар ...

Уалихан ҚОСАНБАЙ