Тимур Досмағамбетов: "Ордабасы" командасында чемпион болуды армандаймын"

- Демалыс уақыты қалай өтті?

- Жыл бойына арпалыспен өткен қиын маусымнан кейін отбасыммен Таиландта демалып, күш жинадым. Маған және менің отбасыма бұл елде демалу өте ұнайды. Содан кейін, дәстүр бойынша жаңа жылды ата-аналарыммен бірге қарсы алдым.

- Өткен маусымды қалай бағалайсыз?

- Өткен маусымды сәтті деп санаймын, команда маусымдағы барлық міндеттерді орындады. Құрамадағы мықты футболшылардың мүмкіндігі жоғары еді. Чемпионаттың соңына дейін күрестік. Дегенмен соңғы бес турдағы жағдайды ескерсек, турнирлік кестеде үшінші орын біздің команда үшін сәтті болды деп ойлаймын.

- Жиынға қандай көңіл-күймен келдіңіз?

- Шынымды айтсам, мен үшін алғашқы жиындарға дейін екі ай үзіліс - көп. Кез-келген жағдайда біз спорттық формаңызды жоғалтқымыз келмейді. Өз бетіңмен қанша жаттықсаң да, командамен бірге жүргендей болмайды. Жеке жаттығумен, ұжым болып жасаған дайындықты салыстыруға келмейді. Оны барлық футболшылар түсінетін шығар.

- Келесі маусымға қандай үміт артасыз?

- Әрине, тек оңынан болсын деп үміт етеміз. Біріншіден, клуб басшылығы алдына қойған барлық міндеттерді орындау алуы керек. Әрине, басты арманым "Ордабасы" сапында ел чемпионы атанып, Шымкент футболының тарихында чемпион болды деген атпен қалсам деймін. Сонымен қатар, Еуропа Лигасында сәтті өнер көрсету.

- Команданың жаңадан келгендерін қалай бағалайсыз? Бұрын біреумен таныс болдыңыз ма?

- Жаңа ойыншылар командаға әлі толық келген жоқ. Дегенмен қазір қатарымызға қосылған Сергей Хижниченкомен бұрыннан таныстығымыз қалыптасқан ежелгі достармыз. Ал, Александр Симчевичпен 2018 жылы "Ордабасы" жиынында таныстық. Сол себепті осы екі жігітпен жақсы таныспыз. Олар бұған дейін де "Ордабасыда" ойнап, шымкенттік жанкүйерлерге жақсы таныс болған ойыншылар.

- Өткен маусыммен салыстырғанда қорғаныс желісі өзгереді. Жаңа ойыншылармен өзара түсіністікті қалай тез жолға қоюға болады?

- Қорғаныс саласындағы өзгерістерге келер болсақ, қандай да бір түсініспеушілік орын алады деп ойламаймын. Себебі жаттықтырушының талаптары барлығына бірдей болады. Талап қатаң болған жерде тәртіп бар. Әрине, ортақ тіл табысу керек, өйткені біз барлық ойын жағдайларында бір-бірімізді қорғап жүруге міндеттіміз. Футбол - ұжымдық ойын. Команданың бірлігі ұлы жеңістерге бастама болады. Сөз соңында жанкүйерлерімізге арнайы сәлем жолдағым келеді. Біз қашан да өз жеңісімізбен, тамаша ойындарымызбен оларды қуантуға күш саламыз. Сол үшін де қазір жан-жақты бағытта жұмыс жасап жатырмыз!

"Ордабасы" ФК