Елжас Алтынбеков: «Алдағы маусымда көрсеткішті ұлғайтып, гол соғуға жұмыс істеймін»
– Елжас, өткен маусым оңайға соқпады. Пандемия салдарынан Премьер-лига желтоқсан айына дейін созылып, суық ауада доп тебуге мәжбүр болдық. Жалпы чемпионат жайлы аз-кем тоқталсаңыз...
– Әрине, өткен маусымды қиын болады деп ешкім күтпеді. Барлығы ойдағыдай басталғанымен 5 айға біріншілік үзіліп қалды. Соның салдарынан көп футболшы формасын жоғалтып алды. Оның арасында өзім де бармын. Тамыз айында жалғасқан соң ойындардың графигы тығыз болды. Бір аптада 3 ойын өткізген сәттерді көрдік. Бұл – футболшылар үшін ауыр болды.
– Өткен маусым сіз үшін сәтті болды деп айта алмаймыз...
– Иә, көп жағдайда қосалқы құрамда қалдым. Оның түрлі себептері бар. Жалпы командада әр позицияда бәсеке жоғары болды. Жаттығу барысында жарақат алып, біршама ойындардан тыс қалдым. Бар жоғы 4 кездесуге шығып, бір мәрте көзге түстім. Бұл – шабуылшы үшін жақсы нәтиже деп айтуға келмейді. Алдағы маусымда көрсеткішті ұлғайтып, гол соғуға жұмыс істеймін.
– Командаға жергілікті жаттықтырушы Сұлтан Әбілдаевтың қайта оралғаны көпшілікті қуантты. Ойыншылар жаңа бапкерді қалай қабылдады?
– Команда Сұлтан Тоқатайұлы тағайындалғанына қуанды. Өңір футболын дамытуда зор еңбек еткен жаттықтырушы. 2016 жылы қол астында жаттығып, Бірінші лигада бақ сынадық. Сұлтан бапкердың арқасында жеңімпаз болып, Премьер-лигаға жолдама алдық. Білікті бапкер. Жаңа бапкермен ел клубтары арасында алғаш болып дайындықты бастадық. Жергілікті футболшыларға көңіл бөлуді қалайды. Бұл біз үшін жақсы жаңалық.
– БАҚ беттерінде өзіңді «Жетісу» мен «Атырауға» ауысады деген ақпар тарады. Бұл ақпар қаншалықты рас?
– Қазір елде трансфер терезесі ашылып, командалар өздеріне қажетті ойыншыларды іріктеуде. Премьер-лигадағы 2-3 командадан ұсыныстар түсті. Бірақ әлі де нақтыланған жоқ. Сондықтан мына командаға ауысам деп айта алмаймын. Әзірге «Қайсардамын». Өзімді түлеткен командада барлығы оңтайлы болса, аймақтың намысын қорғауға дайынмын.
– Жаңа жыл қарсаңында жанкүйерлерге жеткізер жылы лебізің...
– Барша қазақстандықтарды, футболшыларды, жанкүйерлерді жаңа жылмен құттықтаймын! Бастысы, деніміз сау болсын! Жаңа маусымда жанкүйерлермен стадионда көрісетін күнге жетейік!
| № | Команда | И | М | О |
|---|---|---|---|---|
| 1 | Қайрат | 9 | 14-4 | 21 |
| 2 | Ордабасы | 8 | 14-6 | 18 |
| 3 | Оқжетпес | 9 | 12-8 | 16 |
| 4 | Астана | 9 | 13-11 | 15 |
| 5 | Ұлытау | 8 | 8-7 | 14 |
| 6 | Елімай | 9 | 12-9 | 13 |
| 7 | Жеңіс | 9 | 7-10 | 13 |
| 8 | Жетісу | 9 | 11-12 | 12 |
| 9 | Қызылжар | 9 | 11-9 | 11 |
| 10 | Атырау | 9 | 6-5 | 11 |
| 11 | Ақтөбе | 8 | 8-10 | 10 |
| 12 | Тобыл | 9 | 8-14 | 8 |
| 13 | Каспий | 9 | 5-11 | 7 |
| 14 | Ертіс | 9 | 8-12 | 6 |
| 15 | Қайсар | 9 | 5-10 | 6 |
| 16 | Алтай | 8 | 3-7 | 4 |
