Жерар Гоу ел біріншілігінің рекордын жаңартты

27 жастағы шабуылшы өз сериясын 21 мамырда бастап еді. Бұл күні Гоу «Оқжетпес» қақпасын екі рет дәл көздеді. Содан соң «Ақжайық», «Атырау», «Шахтер», «Ордабасы», «Ақтөбе» (2 гол), «Астана», «Жетісу» командаларының қақпа кілтін дәл тапты.  Гоу 8 матчта 10 гол соқты.

Бұған дейінгі рекорд Мұрат Тілешевтың еншісінде болатын. Ол 2009 жылғы маусымда алғашқы турдағы «Қайсар» — «Ақтөбе» (0:1) матчында жеңіс голын енгізді де, содан кейін тағы 5 ойында («Тараз», «Ертіс», «Ордабасы», «Восток», «Оқжетпес») мергендігінен жаңылған жоқ. Яғни, оның голдар сериясы 6 матчқа жалғасты.

Бірақ, Тілешев бұл рекордқа жалғыз ие емес еді. Ол, «бар болғаны», Джафар Ирисметовтың көрсеткішін қайталаған-ды. Өзбек шабуылшысы 2006 жылы «Алматы» командасының намысын қорғап, 10 қыркүйек - 21 қазан аралығындағы 6 турда таблоға өз есімін таңбалап кетті. Оның дәл соққылары «Астана», «Есіл-Богатырь», «Ертіс», «Ақтөбе», «Тобыл», «Екібастузец» командаларының қақпаларында тулады.