Елдос Ахметов: "Бапкер мен жанкүйерлердің сенімінен шығу үшін бар күшімді салдым"
— Елдос, екінші таймда алаң ортасында құлап, жанкүйерлердің зәресін алдыңыз? Не болды? Қазір денсаулығыңыз қалай?
— Ескі жарақатым ғой. Клуб сапында жүргенде алғанмын. Сол сыр берді. Бірақ, қазір бәрі жақсы. Дәрігерлердің қарауынан өттім. Бүгін тағы тыңғылықты тексерістен өтемін.
— Левандоксимен біраз алыстыңыз ғой ...
— Оныңыз рас. Ондай футболшыларды тұсап ұстау керек. Әйтпесе, еркін көсілсе, тоқтату қиын болады. Мен тартыста өзімді еш аяған жоқпын (күліп). Ернім де жыртылды. Дегенмен, бастысы ол емес. Маңыздысы біз Польшаның мысын бастық. Бір ұпай алдық.
— Бапкерлер Сізге Левандовскиге қарсы жеке ойна деген тапсырма берді ме?
— Левандовскиге қарсы менің бір өзім емес, бүкіл команда болып қорғану деген тапсырма болды.
— Бірінші тайм барысында тым дөрекі ойнап кетпедіңіз бе? Қақпамызға пенальти де қойып бердіңіз ...
— Поляктарға қарсы босаңсып ойнауға болмайды. Олар да сызылып, сыпайылық танытқан жоқ. Сондықтан, мен таластан тартынбадым. Пенальтиге келетін болсақ, мен ол жерде допты алып қойғым келді. Әдейілеп барып, аяғынан тепкен жоқпын. Егер, менің сол әрекетімді дұрыс санамайтындар болса, кешірім сұраймын.
— Сіз әдетте клубта сол қапталда ойнайсыз. Құрама сапында Абзал Бейсебеков екеуіңіз оң қапталға жауап бердіңіздер. Жаңа позицияға бой үйрету қиын болған жоқ па?
— Жоқ. Қазақта жүре берсең, көре бересің деген сөз бар ғой. Қорғаушы болып, мен осы уақытқа дейін қорғаныстың барлық жерінде ойнап шыққан шығармын. Сол себепті, бой үйрету қиын болған жоқ. Бапкер маған сеніп, оң қапталды берді. Мен бапкер мен жанкүйерлердің сенімінен шығу үшін бар күшімді салдым.
Уалихан Қосанбай
| № | Команда | И | М | О |
|---|---|---|---|---|
| 1 | Қайрат | 4 | 6-0 | 10 |
| 2 | Ордабасы | 4 | 7-3 | 8 |
| 3 | Елімай | 4 | 7-3 | 8 |
| 4 | Оқжетпес | 4 | 7-4 | 8 |
| 5 | Астана | 4 | 6-5 | 7 |
| 6 | Ертіс | 4 | 6-5 | 6 |
| 7 | Қызылжар | 4 | 4-4 | 5 |
| 8 | Ұлытау | 4 | 3-3 | 5 |
| 9 | Жетісу | 4 | 4-6 | 5 |
| 10 | Атырау | 4 | 2-2 | 4 |
| 11 | Ақтөбе | 4 | 6-7 | 4 |
| 12 | Жеңіс | 4 | 2-4 | 3 |
| 13 | Қайсар | 4 | 1-3 | 3 |
| 14 | Алтай | 4 | 1-3 | 2 |
| 15 | Каспий | 4 | 2-6 | 1 |
| 16 | Тобыл | 4 | 3-9 | 1 |
