Мақсат Байжанов: "Жігіттердің жеңіске деген жігеріне риза болдым"
— Мақсат, Сіз кеше Қазақстан Ұлттық құрамасы сапындағы жалғыз тіреуіш жартылау қорғаушы болдыңыз. Поляктар сапында бұл қызметті Гжегож Крыховяк пен Петр Зелиньски атқарды. Орталық алаңда бұл екі ойыншыға қарсы тұру қаншалықты қиын болды?
— Польша құрамасына қарсы матч тек мен үшін емес, жалпы құрама үшін қиын болды. Әрине, орталық жартылай қорғаушының қызметі қиын ғой. Дегенмен, маған команданың барлық ойыншылары көмектесті. Исламбек Қуат, Серікжан Мужыков және Бауыржан Исламхан төртеуіміз орталық алаңда жақсы түсінісіп ойнадық. Қорғанған сәтте қорғаушылар өз қызметін жақсы атқарып, шабуыл шебіндегі футболшылар артқа қайтып отырды.
— Үзіліс кезінде не болды? Командамыз екінші таймға адам танымастай өзгере шықты ғой ...
— Айтарлықтай ештеме (күліп). Әдеттегідей жиналыс. Тынығып алдық. Жігіттермен сөйлесіп алдық.
— Бұл құрама сапында ең тәжірибиелі ойыншы Сіз болдыңыз. Үзілісте жігіттерді Сіз де біраз қамшылап алған шығарсыз?
— Польшаға қарсы Бауыржан Исламхан бірінші мәрте капитандық қызметті атқарды. Басында шамалы қобалжығанын байқадым. Кейін үйреніп кетті. Үзіліс кезінде негізі бапкерлер кеңес айтты. Одан кейін капитан. Сосын мен де жігерлендірдім. Жігіттердің жеңіске деген жігеріне риза болдым. Бірақ, тең түсіп қалдық. Дандайсымай-ақ қояйын. Осы көрсеткішке де шүкір дейміз. Ендігі ойындарда бұйырса нәтиже бұдан да жақсы болады деген сенімдеміз.
— Сіз осы уақытқа дейін құрама сапында бірнеше бапкерлермен жұмыс істедіңіз. Өзіңіздің тәжірибиеңізге сүйене отырып, Талғат Маруанұлының қай жағынан мықты екенін айтып берсеңіз ...
— Әр бапкердің өз стильі болады. Біреуі тәртіпке ден қояды. Енді бірі тактика деп доппен көп жұмыс істетеді. Ал, Талғат Маруанұлының бойынан мұның барлығын табуға болады. Мықты жігерлендіреді. Әрбір футболшымен жеке жұмыс істейді. Сонымен қатар, біз Нұркен Мазбаевтың жұмысын атап кеткеніміз дұрыс болар. Қарсыластың тактикасын бізге жілік шаққандай шағып берді. Сондықтан, біз алаңға шыққанда поляктардың қай жері мықты, қай жері осал екенін оңай біліп отырдық.
Уалихан Қосанбай
| № | Команда | И | М | О |
|---|---|---|---|---|
| 1 | Ордабасы | 15 | 27-9 | 37 |
| 2 | Қайрат | 17 | 29-12 | 36 |
| 3 | Оқжетпес | 15 | 21-16 | 27 |
| 4 | Елімай | 15 | 23-19 | 23 |
| 6 | Астана | 15 | 21-17 | 23 |
| 6 | Ұлытау | 15 | 13-14 | 23 |
| 7 | Ақтөбе | 15 | 18-14 | 22 |
| 8 | Атырау | 15 | 11-11 | 18 |
| 9 | Жетісу | 15 | 20-22 | 18 |
| 10 | Жеңіс | 15 | 13-18 | 18 |
| 11 | Қайсар | 16 | 13-19 | 17 |
| 12 | Қызылжар | 16 | 17-24 | 15 |
| 13 | Тобыл | 15 | 16-23 | 15 |
| 14 | Каспий | 15 | 10-19 | 11 |
| 15 | Ертіс | 15 | 14-21 | 10 |
| 16 | Алтай | 15 | 10-18 | 10 |
