Әлем чемпионатындағы Қазақстан Ұлттық құрамасының статистикасы

Жалпы әлем біріншілігінде Қазақстан Ұлттық құрамасы төрт кездесу өткізгенін жақсы білесіздер. Оның үшеуін біздің футзалшылар турнирдің топтық кезеңінде өткізді. Алдымен Аргентина құрамасынан 0:1 есебімен жеңілсек, содан соң Коста-Риканы 3:1, кейін Соломон аралдарынан 10:0 есебімен үстем түстік.

Осы  төрт кездесуде Қазақстан Ұлттық құрамасы қарсылас қақпасына 15 доп тоғытса, Игита мен Гуров өз қақпаларына 7 гол жіберіп алды. Оның бесеуін бізге Испания құрамасының ойыншылары соқты.

Турнир барысында біздің ойыншылар қарсылас қақпасына 63 тура соққы жасапты. Қазақстандық футзалшылар Соломон аралдарының қақпашысын көп мазалаған екен. Бұл елдің қақпасына біздің ойыншылар 25 соққы жасаса (жалпы көрсеткіштің 40 пайызы), Коста-Рика қақпасына 16, Аргентина қақпасына 7 және Испания қақпасына 15 тура соққы жасаған.

Сербияда өткен Еуропа чемпионатында жасындай жарқылдаған қақпашымыз Игита бұл әлем біріншілігінде көсіліп өнер көрсете алмады. Ол төрт ойында 37 мәрте қарсылас бағыттаған соққыны қайтарыпты. Пайыздық көрсеткіші 84,1-ге тең келеді. Әлем чемпионатында әзірше португалиялық қақпашы Бебенің мерейі үстем болып тұр. Бұл бағана күзетшісі өз қақпасына бағытталған 34 допты (94,4 пайыз) қайтарыпты. Оның үстіне Португалия құрамасы әлі бәсекені жалғастырып жатыр.

Қазақстан құрамасы қарсыластарына қарсы 29 мәрте ойын ережесін бұзса, оның 7-де сары қағаз алып қалған. Ал, біздің құрамаға қарсы қарсыластар да 29 мәрте ереже бұзып, тек 3-де ескерту көрсетілген.

Дуглас пен Павел Таку Колумбияда өткен турнир барысында Қазақстан құрамасының үздік сұрмергендері атанды. Олардың еншісінде 3 голдан бар.