Талғат Адырбеков: "Қолаға талас енді қыза түсті"

— Талғат, бүгін «Ордабасының» ойыны мүлде жүрмеді? Себебін айтып бере аласыз ба?

— «Астанаға» қарсы ойнау қай командаға болсын қиын. Мықты ойыншылардан құралған команда. Бірақ, мен «Ордабасыны» осал дей алмаймын. Осы ойын алдында біздің бірнеше футболшыларымыз жарақат алып қалған болатын. Сол үшін матч алдында Бақтияр Даниярұлы бірнеше өзгерістер жасады. Жылдам гол соғу деген мақсат болған. Алайда, бірінші минуттан-ақ «Астана» ойыншылары допты өз бақылауларына алды. Содан соң біз тек қарсы шабуылға шығып ойнадық. Екінші таймда енді-енді өз ойынымызды тауып келе жатқанымызда, капитанымыз алаңнан қуылды. Ал, он ойыншымен елордалықтарға қарсы тұру, қиынның қиыны.

— Самат Смақовтың қызыл қағазы туралы не айта аласыз?

— Мен бұл жағдайға байланысты ештеңе айта алмаймын. Төрешілердің шешімі. Ол кезде мен артта, қорғаныста едім. Не болғанын көрген жоқпын.

— Сіз ойынға екінші таймда қосылдыңыз. Матчтың қарқынына ілесіп кету қиын болған жоқ па?

— Жоқ. Керісінше, оңай болды деп айтсам болады. Өз жанкүйерлеріміздің алдында ойнау мен үшін мүлде қиын емес.

— Алаңға шығар алдында бапкер Сізге қандай нұсқау берді?

— Александр Симчевичті алға шығарып, қорғаныстың оң қанатына жауап беріп, шабуылға дем бер деді. Өйткені, Дмитрий Шомко бүгін шабуылға жиі қосылды. Соның бос қалған аймақтарын пайдалану керек болғанбыз.

— Көкшетауда «Ертіс» «Оқжетпестен» үстем түсті. Осылайша, павлодарлықтар үшінші орынға көтерілді. Сіздер төртке түсіп қалдыңыздар. Бұл туралы хабардар шығарсыз ...

— Иә, «Ертіс» бізден бір ұпай алға шықты. Дегенмен, әлі алда ойындар бар. Сол ойындарда қажетті ұпайды жинаймыз деген ойдамын. Қолаға талас енді қыза түсті.

Уалихан Қосанбай