Алтынбек Сапаров: "Екінші алтылықта мүмкіндігінше жоғары орыннан көріну керекпіз"

— Алтынбек, жеңістеріңіз құтты болсын! «Атырау» қатарынан бес ойын жеңген жоқ еді. Бүгінгі ойын туралы айтып өтсеңіз ...

— Рақмет. Бұл жеңіс - біз үшін өте маңызды еді. Өйткені, сіз айтып өткеніңіздей, біз бес ойында (2 тең есеп, 3 жеңіліс – ред) толық үш ұпай ала алмаған едік. Команда сапында бірнеше ойыншылар ауыр жарақат алып, қиын кезеңдерге тап болдық. Ізімізді қуып келе жатқан командалар да жақындап қалды. Жағдайды қиындатпау үшін біз бүгін жеңу керек болдық. Жігіттердің барлығы да тек жеңіс үшін ойнады.

— Сіз орталық алаңда тәжірибиелі Александр Пищурға қарсы ойнадыңыз. Украиналық жартылай қорғаушыны тұсап ұстау қиын болған жоқ па?

— Жердегі таласта мен одан еш кем болмадым. Әуеде шамалы қиналдым. Бірақ, әріптестерім дер кезінде көмектесіп тұрды. Сондықтан, біз бүгін орталық алаңдағы басымдықты өз қолымызда ұстадық.

— Бұл жеңістен кейін психологиялық тұрғыдан командаластарыңыздың көңіл-күйі көтеріліп қалған шығар?

— Солай деуге де болады. Соңғы кездері тілшілер тарапынан да, жанкүйерлер тарапынан да бізді сынаушылар көбейіп кетіп еді. Енді шамалы басылатын шығар. Біз бұл жеңіспен тоқтап қалмаймыз. Бұдан кейін де жақсы ойынмен жанкүйер көңілінен шығамыз деген ойдамын.

— Бүгінгі таңда команданың алдына қойылған тапсырма қандай?

— Әуелде бірінші алтылыққа кіру деген тапсырма бар еді. Өкінішке қарай, біз оны түрлі себептерге байланысты орындай алмадық. Енді екінші алтылықта мүмкіндігінше жоғары орындардан көріну керекпіз. Негізі, біздің біріншілікте бірінші алтылыққа қарағанда, екінші алтылықтағы тартыс қызықты өтеді. Өйткені, кез-келген сәтте қарсыласың қуып жетіп, озып кетуі мүмкін. Сондықтан, енді бізге босаңсуға мүлде болмайды.

Уалихан Қосанбай