Роман Муртазаев: "Қара басымның емес, команданың жағдайын ойлайтын шабуылшымын"

— "Ақтөбеге" қарсы кездесудің бірінші бөлігін керемет өткіздік. Өздеріңіз көрдіңіздер, төрт гол соғып алдық. Осы басымдықтан кейін екінші таймда шамалы босаңсып қалдық. Бапкер де, жігіттер де мұны байқады. Тек екінші таймның ортасына қарай қайта жиналып, тағы бір гол соқтық. Ел біріншілігінің аяқталуына жақын қалды. Сондықтан, алдағы ойындардың барлығы біз үшін маңызды. Ұпай жоғалтпау керекпіз. Әрине, қазір біздің команда ішінде барлығы керемет дей алмаймыз. Дегенмен, біз нәтиже үшін, жанкүйерлер үшін аянып қалмаймыз.

 — Мергендер тізімінде 17 голмен Сіз екінші орында келесіз. Жеке өз алдыңызға ел біріншілігінің үздік сұрмергені атану деген мақсат қойып отырсыз ба?

 — Мен қара басымның емес, команданың жағдайын ойлайтын шабуылшымын. Егер команда жеңіп жатса, онда гол да болады. Мүмкін сол кезде мен үздік сұрмерген атанатын да шығармын.

 — Келесі кездесуде Сіздер «Ордабасыға» қарсы ойнайсыздар. Бұл ойында қоланың мәселесі де шешіліп қалуы мүмкін. Жалпы, осы ойыннан Сіз не күтесіз?

 — Шымкентте ойнау қай команда үшін де қиын болады. Мен қиын ойын болады деп топшалаймын. Оның үстіне сіз айтып өткендей, қоланың да тағдыры шешіліп қалуы мүмкін. Сондықтан, біз тек жеңіс үшін ойнаймыз. Қазір жігіттер демалысқа кетті. Бірақ, барлығының ойында осы ойын тұр. Шымкентте жеңіске жетсек, онда жағдайымыз дұрысталып қалар еді. Ал, мен қазір ұлттық құраманың сапындамын. Алдағы іріктеу ойындарына дайындалып жатырмыз.

 — Ұлттық құрама деп қалдыңыз. Алдағы Черногория мен Румыния құрамаларына қарсы кездесуден жанкүйерлерге не күтуге болады?

 — Жақсы ойын. Біз қазір сол ойындарға тыңғылықты дайындалып жатырмыз. Бұйырса, жанкүйерлер үшін жақсы ойын көрсетеміз деген ойдамын.

Уалихан ҚОСАНБАЙ