УЕФА коэффиценті. Қазақстан қанша ұпай жинады?

Біз алдымен Еуропа алаңдарында «Қазақстан қанша ұпай алды?» деген сұрақтан бұрын, «УЕФА коэффиенті қалай үлестіріледі?» деген мәселені ашып алайық. Еуропа футбол қауымдастығының аясында орналасқан елдер үшін УЕФА-ның ұпайы келесідей таратылады:

• Іріктеу кезеңдері: жеңіс-1 ұпай, тең ойын -0,5 ұпай, жеңіліс – 0;
• Негізгі кезең(топтық, плей-офф кезеңі): жеңіс – 2 ұпай, тең ойын – 1 ұпай, жеңіліс – 0;
• ЧЛ-ның топтық кезеңіне шыққан елге 4 қосымша ұпай;
• ЧЛ-ның 1/8 финалға 5 қосымша ұпай;
• ЧЛ-ның 1/4, 1/2 және финалына сонымен қатар ЕЛ-ның финалына қосымша 1 ұпай.

Командалар Еуропадағы клубтық додаларды аяқтаған соң, әр елдің «маусымдық коэффиценті» есепке алынады. Есептелген коэффиценттерді (қосымша ұпаймен бірге) сол елдің атынан неше клуб өнер көрсетсе, сол санға бөледі.

Енді біз биылғы жылғы Қазақстан клубтарының жинаған ұпайларын санамалап көрейік. Сөзсіз, биыл бізге ең көп ұпайды «Астана» алып берді. «Мариборды» өз алаңында жеңгені үшін 1 ұпай, «ХИК» пен «АПОЭЛ» ұжымдарын бір рет жеңіп, бір рет тең түскені үшін 1,5 ұпайдан, «Галатасараймен» екі мәрте тең ойнап 2 ұпай, «Атлетико» және «Бенфика» ұжымдарымен тең түсіп тағы 2 ұпай алды. 

Одан бөлек, «Астанаға» Чемпиондар лигасының топтық кезеңіне жеткені үшін қосымша 4 ұпай берілді. Сөйтіп, Станимир Стойлов шәкірттері 2014/15 маусымда Қазақстан қоржынына салған ұпайы 12-ге тең келеді. 

Алматының «Қайраты» биыл Еуропа лигасының плей-офф кезеңіне дейін жеткені белгілі. Осы кезеңге дейін Владимир Вайсстың шәкірттері 8 ойын өткізді. Оның бесеуінде жеңіске жетіп, 1 кездесуде тең түсіп, 2 матчта жеңілген ұжым Қазақстан қоржынына 5,5 ұпай сыйлады.

Ал, Еуропа лигасының бірінші іріктеу кезеңінен аса алмаған «Ақтөбе» мен «Ордабасы» клубтары 0,5 ұпайдан жинады.

Осылайша биыл Қазақстандық төрт клуб бас-аяғы 18,5 ұпай еншіледі. Жоғарыда көрсеткеніміздей бұл ұпайларды енді сол 4 клубқа бөлу қажет. Сонда 4,625 ұпай шығады. Бұл біздің биылғы көрсеткішіміз.

Мұнша ұпаймен Қазақстан УЕФА коэффиценттер көрсеткішінде әзірше 28-ші орында тұр. Әзірше деп айтуымыз да жай емес. Себебі, бізден төмен тұрған кейбір елдердің клубтары әлі де болса Еуропа алаңдарында өнер көрсетіп жатыр. Сол командалар жорығын аяқтаған кезде, кестедегі көрсеткіштер тағы да өзгеруі мүмкін.

Уалихан Қосанбай

фотолар "Астана" және "Қайрат" футбол клубтарының сайттарынан алынды