Елдос Ахметов: "Астана-Арена" біз үшін құтты стадионға айналып келе жатқан секілді"

– Елдос, ойын жайлы ойыңызды айтсаңыз?

– Матч негізі өте ауыр өтті. Біз қолдан келгеннің бәрін жасадық. Бапкер қойған тапсырманың біршамасын орындадық. Допқа көп иелік еттік. Қос қаптал арқылы қыспаққа алдық. Румындардың да осал қарсылас емес екендігін білесіздер. Дегенмен, өз алаңымызда басымдылық көрсеттік.

– Нәтиже жайлы не айтасыз? Бір ұпай қоржынға түсті ғой...

– Біздің көңілімізді жабырқатып тұрған сол нәтиже. Жеңіс үшін ойнадық. Черногориядан кейін тек қана жеңіске жетеміз деп шықтық. Жанкүйерлерден кешірім сұрағымыз келді. Олар бүгін де бізді күннің суығына қарамастан қолдап отырды. Бірінші таймда мүмкіндікті жіберіп алдық. Сосын ойынның соңғы 10 минутында гол соғатын тамаша 2-3 мүмкіндік болды. Соғуымыз керек еді. Сәл жетпеді.

– Қорғаныста өте сауатты ойнадыңыз. Соңында бұрынғы алған жарақатыңыз сыр берсе де, соңына дейін ойнап шықтыңыз ғой деймін.

– Мен Черногориямен болған ойынға қатыспадым. 2-3 күн кішкене тынықтым. Мына матчта барымды саламын деп шықтым. Жалпы әріптестерімнің барлығы да шабыттанып ойнады ғой. Жеңісті жұлып кеткіміз келді. Сондықтан, жарақатымды ойлайтын уақыт болмады. Соңына дейін шыдағым келді. Ұлттық құраманың ойыны болған соң, күллі қазақстандық жанкүйер алдында соңына дейін ойнамасақ, несіне жүрміз?!

– Соңғы кезде Қазақстан Ұлттық құрамасы стандарттық жағдайларды аз орындап жүр. Небәрі екі ғана бұрыштама беріппіз.

– Бұл енді бапкердің тактикасы. Бізге қандай ұстаным береді, біз соған жүгінеміз. Көбінесе жерлете пастар беріп, комбинациялық ойын көрсеткіміз келді. Ал, матч соңында стандартқа да жүгіндік. Сәл сәттілік жолдас болғанда кім біледі, сол стандарттың бірінен гол да соғып кетер ме едік?! Бірақ, осы бір ұпайға да шүкір дейік. Себебі, румындар да бір гол соғып кетулері мүмкін еді.

– «Астана» командасы секілді Қазақстан құрамасы да «Астана-Аренада» жеңілмейтін болып келеді байқасаңыз. Бұл ненің белгісі болуы мүмкін.

– Бұл стадионның өзінің бір сиқыры бар. Қазақстандық футболшыларға жағады. Ал, сырттан келгендер сасқалақтайды. «Астана» командасы бұл жерде еурокубоктық ойындарда ұтылмайтын командаға айналды. Лайым солардың жолын құрамаға да берсінші. Өз алаңда жеңілген деген футболшылар үшін өте ауыр соққы. Мен негізі ырымға сене беретін адам емеспін. Бірақ, «Астана-Арена» біз үшін құтты стадионға айналып келе жатқан секілді.

Ермұхамед МӘУЛЕН