Әлішер Сүлей: "Жетісуға" қарсы кездесуде жігіттер аздап қобалжып ойнады"

— Бұл ойында жеңіс екі командаға да қатты керек болды. Сондықтан, біз қателік жасамай, сауатты ойнауға тырыстық. «Жетісуға» қарсы кездесуде жігіттер аздап қобалжып ойнады. Өйткені, бұл кездесуде жеңілсек, жағдайымыз тіпті қиын болатын еді. Бапкер әу баста-ақ қорғанысты көп ойлап, тактиканы солай қойған. Қарсы шабуылға үміт арттық. Менің ойымша, біз бапкердің тапсырмасын орындап шықтық.

— Матчтың екінші таймы басталар сәтте ауа-райы күрт өзгеріп кетті. Бұл Сіздердің ойындарыңызға кері әсерін тигізбеді ме?

— Жоқ. Біз ойынға келгенде Талдықорғанда жауын-шашын болатынын болжаған едік. Ылғалды алаңда жаттығу да жасадық. Сондықтан, ауа-райы біздің ойынымызға қатты әсер етпеді.

— Матчтағы төрешінің жұмысы туралы не айта аласыз?

— Төрешілер туралы ештеме айта алмаймын. Алаңда олар өздерінің, біз өзіміздің жұмысымызды істедік.

— "Жетісуға" қарсы кездесуде өз ойыныңызға көңіліңіз толды ма?

— Шынымды айтсам, жоқ. Біз бұл ойында көбіне қорғаныста болдық қой. Сол себепті, командаластарым маған допты аз жеткізіп жатты. Содан ойынға көп араласа алмадым.

— Алда екі тур ғана қалды. «Тараз» болса турнир кестесінің 11-ші сатысында тұр. Қалай ойлайсыз, командаңыз тоғыспа кездесусіз-ақ Премьер-лигада қала алады ма?

— Барлығы өз қолымызда. Оның үстіне қалған екі ойынды біз өз алаңымызда өткіземіз. Сол ойындарда 6 ұпай алу керекпіз. Сонда ғана тоғыспа кездесулерсіз біз Премьер-лигада қалуға мүмкіндік аламыз.

Уалихан ҚОСАНБАЙ