Сергей Малый: "Қай қалада, қай стадионда ойнайтынымызды біз таңдаған жоқпыз"

— Сергей, алдымен ойын туралы айтып өтсеңіз ...

— Өздеріңіз көргендей, ойын өте қиын болды. Кеше біз Алматыға ұшып келгенде ауа-райы жақсы еді. Бірақ, бүгін күрт өзгерді. Алаң қарға көміліп қалды. Сондықтан, допты әуеде көп ұстап, ұзын пастар арқылы ойнадық. Әрине, мұндай жағдайда біз ештеме істей алмаймыз. Ойнау керек керек еді, біз алаңға шығып қолдан келгенімізді істедік.

— Ойын алдында Кахабер Цхададзе мұндай ауа-райы «Қайрат» үшін қолайсыз, ал «Астана» үшін қолайлы деп еді. Сіз осы сөзбен келісесіз бе?

— Қай қалада, қай стадионда ойнайтынымзды біз таңдаған жоқпыз. Бірақ, біз бүгін жеңіске жеттік. Демек, «Астана» үшін ауа-райы қатты кедергі болмады деп айтуға болады.

— Сіздер бұған дейін ел чемпионы атандыңыздар. Енді оған Қазақстан Кубогын қосып отарсыздар. Маусымды ақырындап қорытындылай келе, биылғы жылды «Астана» үшін сәтті өтті деуге келеді ме?

— Иә. Менің ойымша биылғы жыл біз үшін сәтті өтті деп ойлаймын.

— Енді алда АПОЭЛге қарсы кездесу күтіп тұр. Сол ойынға шамалы тоқталып кетсеңіз ...

— Ол ойында біз міндетті түрде жеңіске жету керекпіз. Ішкі біріншіліктегі бар ойын аяқталды. Енді барлық дайындығымызды Еуропа лигасына арнайтын боламыз. Қалған екі ойында тек жеңіс үшін ойнаймыз. Топтық кезеңнен шығу үшін, сонымен қатар, келер маусымда рейтингтегі жағдайымызды дұрыстау үшін бізге ұпай қатты керек.

— Соңғы рет қарға көміліп қалған алаңда қашан ойнап едіңіз?

— Мұндай ауа-райында мен өткен маусымда ойнадым. Ол кезде мен «Шахтер» сапында өнер көрсететін едім. «Астанаға» қарсы кездесуде Қарағандыда ара-райы дәл осындай болған.

— Әңгімеңізге рақмет!

Уалихан ҚОСАНБАЙ