Какау жігіттері жеңісті жолды жалғады
Италиялық азулы «Реал Риети» командасына қарсы қиын кездесуден кейін Какау шәкірттерін турнирдің дебютантына қарсы матч күтіп тұрған. Элиталық кезеңге жеткенінің өзі сенсацияға баланған «Феникс» алғашқы ойында латыш елінен келген «Никарс» командасына есе жіберген еді. Алайда, үш доп соғып шабуылда қауқарлы екенін байқатып та қалған болатын.
Кездесудің алғашқы минуттарынан «Қайрат» ойыншылары ойын тізгінін қолға алды. Жылдам гол да көп күттірген жоқ. Өткен матчта қос голдың авторы атанып, командасының жеңісіне түбегейлі үлес қосқан Диваней осы жолы да мергендігімен көзге түсті. Жиырма тоғызыншы секундта Игордың пасынан кейін Крис қорғаған қақпаны дәл көздеп, есеп ашты. «Қайраттың» екінші голы көп күттірді. Допқа толықтай иелік етіп, қарсылас қақпасының маңын торуылдаса да, нәтиже бермей жатты. Әйткенмен, тағы да Диваней өз сөзін айтты. Командасының матчтағы екінші добын, турнирдегі өзінің төртінші голын атына жазды. Ал, тайм аяғында Дрот есепті 3:0-ге жеткізді.
Екінші таймда да Какау шәкірттері қарқынды бәсендеткен жоқ. Ойынның алғашқы бөлігіндегідей жылдам доп соқты. Голдың авторы - Дәурен Нұрғожин. Осыдан кейін матч соңына дейін үнсіздік танытқан «Қайрат» футзалшылары соңғы екі минутта Дуглас пен Тайеби екі доп дарытып, қорытынды есепті тіркеді. Есеп 6:0!
Топтағы соңғы кездесуін «Қайрат» жексенбі күні латвиялық "Никарсқа" қарсы өткізеді.
Футзал. Элиталық кезең.
«Қайрат» - «Феникс» - 6:0 (3:0)
Голдар: Диваней 1, 14, Дрот 18, Нұрғожин 22, Дуглас 38, Тайеби 40
Ескертулер: Ронкальо 3, Нұрғожин 35
«Қайрат» (Қазақстан): Игита, Ронкальо – Упалёв, Нето, Тайеби, Игор, Сүлейменов(К), Алешандре, Дрот, Дуглас, Диваней, Нұрғожин, Барон, Есенаманов;
«Феникс» ( Косово): Крис, Юсуфи-Виктор Виейра, А. Брахими, Саго, К. Гаши, Алибегу, Топила, Мулай, Рамадани, Мейзини(К), Шп. Брахими
Төрешілер: Петар Мантев (Македония), Траян Енчев (Болгария)
25 қараша. Алматы. «Алматы Арена».
Ойынның қысқаша статикасы:
Соққылар: 49-12
Дәл бағытталған: 24-3
Қиыс кеткен: 16-5
Тәртіп бұзу: 6-5
Ескертулер: 1-1
Фараби ӘБДІХАЛЫҚ
| № | Команда | И | М | О |
|---|---|---|---|---|
| 1 | Ордабасы | 28 | 58-20 | 67 |
| 2 | Қайрат | 27 | 52-20 | 60 |
| 3 | Астана | 27 | 44-27 | 51 |
| 4 | Оқжетпес | 28 | 42-37 | 48 |
| 5 | Ақтөбе | 28 | 42-35 | 45 |
| 6 | Елімай | 27 | 38-37 | 41 |
| 7 | Тобыл | 28 | 39-38 | 40 |
| 8 | Ұлытау | 27 | 26-32 | 35 |
| 9 | Каспий | 27 | 29-37 | 32 |
| 10 | Жеңіс | 28 | 29-38 | 32 |
| 11 | Қызылжар | 28 | 28-41 | 27 |
| 12 | Атырау | 27 | 21-31 | 26 |
| 13 | Ертіс | 27 | 26-37 | 26 |
| 14 | Алтай | 27 | 27-38 | 25 |
| 15 | Жетісу | 28 | 28-46 | 25 |
| 16 | Қайсар | 28 | 24-39 | 24 |
