Үздік төрттіктің қатарында жетінші рет

Турнирдегі алғашқы кездесуде косоволық «Фениксты» әупірімдеп жүріп жеңген «Никарс» екінші ойында италиялық «Реал Риетиден» ойсырай ұтылған еді. Келесі кезеңге өту мүмкіндігінен айырылған латыштар үшін соңғы матч «Қайрат» секілді алыпқа қарсы күш сынап көретін мүмкіндік қана болатын.

Какау «Феникске» қарсы кездесумен салыстырғанда қақпаға Игитаны тұрғызды. Матч «Қайраттың» кезекті рет жылдам голымен басталды. Косоволықтарға қарсы ойында Диваней алғашқы минутта қарсылас қақпасын дәл көздеген-тұғын. Бұл жолы Игор бар болғаны оныншы секундта Астраханцев қорғайтын иеліктен саңылау тапты. Содан кейін, үздік сұрмергеніміз Диваней бірінші тайм аяқталғанша үш доп соғып тастады. Әсіресе, Дивенейдің үшіні және төртінші голдары әдемі шықты. Екеуінде де, допты жерге түсірмей шірене тартып жанкүйерлерді тамаша голдардың куәсі қылды.

Екінші таймда он бес минут бойы таблодағы көрсеткіш өзгермей тұрды. «Қайрат» футзалшылары тағы бір мәрте қақпаға доп дарытқан... Әйткенмен, айып алаң ішіндегі қарбалас кезінде Нето өз қақпасына гол соғып алды. «Қайрат» турнирде өз қақпасына үш доп өткізсе, соның екеуі автогол. 1:4 есебі ойынның аяғына дейін өзгерген жоқ. Тоғыз ұпаймен «Қайрат» көш бастаса, еншісінде үш ұпайы бар "Никарс" үшінші орынды қанағат тұтты.

Футзал. Элиталық кезең.                                   

«Никарс» - «Қайрат»- 1:4 (0:4)

Голдар: Нет автогол 35 - Игор 1, Диваней 4,7,11

«Никарс» ( Латвия): Астраханцев, Шкестерс-Камбалс – Пастарс, Архипов-Прокофьев, Колесников, Матюшенко, Алексеев, Дацко (к), К.Забаровский, Сень, Эвертон, Аванесов, Вандерсон, Д.Забаровский

«Қайрат» (Қазақстан): Игита, Ронкальо – Упалёв, Нето, Тайеби, Игор, Сүлейменов(К), Алешандре, Дрот, Дуглас, Диваней, Нұрғожин, Барон, Есенаманов;

Төрешілер: Марк Брикетт (Англия), Камил Четин (Түркия)

27 қараша. Алматы. «Алматы Арена».

Ойынның қысқаша статикасы:

Соққылар: 13-49

Дәл бағытталған: 4-15

Қиыс кеткен: 5-21

Қақпашылардың сейвтары: 11-4

Тәртіп бұзу: 8-4

Ескертулер: 0-0

Фараби ӘБДІХАЛЫҚ