Эрфан Зенели: "ХИК"-пен салыстырғанда "Шахтерда" шамалы жоғары жалақы аламын"

Дәл сол футболшы енді "Шахтер" клубын өрге сүйрейтін футболшылардың қатарына қосылды. Осы орайда Kazfootball.kz порталы Зенелимен сұқбаттасып, біраз сауалдардың жауабын алған болатын.

—  Эрфан, Қазақстанға қош келдіңіз. "Шахтермен" қанша уақытқа келісім-шарт жасадыңыз?

— Рақмет. "Шахтермен" бір жылдық келісім-шартқа қол қойдым.

—  Жаңа командаңыздың қатарына қашан келдіңіз?

— Жұма күні келіп қосылдым. Қазір командамен біргемін. Бірнеше жаттығу жұмыстарын жасап үлгердім.

—  Командаластарыңыз Сізді қалай қабылдады?

— Жақсы. Менің байқауымша "Шахтер" қазір жаңа команда жинап жатыр. Алдағы маусымға жоспарлары да жақсы. Бұйырса, сол жоспарларды орындауға менің де көмегім тиеді деп ойлаймын. Командаға көмектесу үшін қолдан келгеннің барлығын аямаймын.

—  "Шахтер" осыдан екі-үш жыл бұрын Қазақстандағы ең күшті командалардың бірі болған. Тіпті Қазақстан тарихында Еуропа лигасының топтық кезеңінде ойнаған тұңғыш команда атанды. Командаға келер кезде бұл туралы білдіңіз бе?

— Шынымды айтсам, білмедім. Дегенмен, қазір ақырындап біліп келе жатырмын. Қарағанды қаласы туралы. Клубтың тарихы туралы команда қатарында бұрыннан ойнап жүрген футболшылардан сұрап жүрмін.

— Қарағандыға жолыңыз қалай түсті?

—  Менің 2015 жылдың соңында "ХИК"-пен келісім-шартым аяқталды. Содан кейін еңбек демалысымды өткізіп жүргенмін. Ақпан айының ортасында агентім хабарласып, қазақстандық клубтан ұсыныс түскенін айтты. Сөйтіп, клубтың бапкерлерімен, басшыларымен келіссөздер жүргіздік. Соңында бір бітімге келдік.

—  Сонда Сіз басқа футболшылар секілді бапкерлердің бақылауынан өткен жоқсыз ба?

—  Өттім әрине. Бірақ, ұзақ уақыт дей алмаймын. Келіссөздерді жүргізуге келгенде командамен 2-3 күн болдым. Келісімге келгеннен соң үйге барып, қайта келдім.

—  Егер құпия болмаса "Шахтер" клубында қанша жалақы аласыз?

—  Кешірім сұраймын. Мен бұл сұраққа жауап бере алмаймын. Қаржылық құпия.

—  Ал, "ХИК" сапында жүргенде қанша алатын едіңіз?

—  Бұл сұраққа да жауап бере алмаймын. Бірақ, "ХИК"-пен салыстырғанда "Шахтерда" шамалы жоғары жалақы аламын.

—  Сіздің өткен жылы "ХИК" клубымен Қазақстанға келгеніңізді білеміз. Оған дейін біздің елде болған ба едіңіз?

—  Жоқ. Болғаным жоқ. Тек "ХИК" клубымен ғана бір рет келдім.

—  "Шахтер" сапына өткен кезде кіммен ақылдастыңыз? Жалпы, Қазақстанда ойнайтын достарыңыз бар ма?

—  Бірінші кезекте отбасыммен ақылдастым. Одан кейін агентіммен. Дәл қазір менің Қазақстанда ойнап жүрген достарым жоқ. Алайда, бұрын ойнаған бір-екі футболшыны танитын едім. Солар Қазақстан туралы аз-кем айтып берді.

—  "Шахтер" сапында бірнеше жаттығу да өткізіп үлгердіңіз. Қазақстан мен Финляндия футболының арасындағы қандай ерекшеліктерді байқадыңыз?

—  Көп айырмашылық бар деп айта алмаймын. "ХИК"-те біз физикалық дайындыққа ерекше көңіл бөлетін едік. "Шахтерда" да көбіне физикалық дайындыққа ден қояды екен.

—  Айтпақшы, "ХИК"-пен бірге келгеніңізде "Астана" қақпасына үшінші голды соғып, біздің клубты Чемпиондар лигасынан шығарып жіберуге шақ қалдыңыз. Сондықтан, Сізді Қазақстанда құшақ жайып қарсы алады деп ойламаймын ...

— Иә, ол жағын білемін. Бірақ, мен ол кезде "ХИК" ойыншысы едім. Мен тек өз жұмысымды істедім. Енді "Шахтердің" биік белестерді бағындыруы үшін тынбай жұмыс істеймін. Жанкүйерлер маған түсіністікпен қарайды деген ойдамын.

— Сұқбат бергеніңізге рақмет. Жаңа клубыңызда сәттілік тілеймін!

— Сізге де рақмет!

Уалихан Қосанбай