"Тараз" футбол орталығының балаларына жаңа спорттық жабдықтар тапсырылды
УЕФА Чемпиондар Лигасының 2015/2016 жылғы топтық кезеңінде Қазақстандық "Астана" командасының сәтті өнер көрсеткені үшін Еуропалық футбол ассоцияциясы, яғни, УЕФА Қазақстанға 5 миллион еуро көлемінде қомақты қаражат бөлді. Бұл мақсатты транш болатын. Өйткені, осы қаражатты еліміздегі балалар мен жасөспірімдер футболын дамыту үшін берген еді.
Осыны ескерген Қазақстан футбол федерациясы бұл ақшаны әр өңірге бөлді. Бірақ, олар бөлген кезде футболдан қай облыс қандай нақты нәтиже көрсетті, қай облыстың футбол мектептері жақсы қалыптасқан, қай өңірден шыққан футболшылар Ұлттық құрамада, Премьер–лига ойындарында сәтті өнер көрсеткендігін ескерді.
Өйткені, мақсат біреу ғана. Елімізде балалар мен жасөспірімдер футболын дамыту. Оларға жағдай жасап, футбол орталықтарының материалдық–техникалық жағдайын нығайту болатын.
Әрине, бұл тұрғыда өзіндік үлкен футбол мектебі қалыптасқан, Қазақстанға көптеген үздік футболшылар сыйлаған Жамбыл футбол мектебі де ескерусіз қалған жоқ. Балалар мен жасөспірімдер футболын дамыту үшін ҚФФ 90 миллион теңге қаражат бөлді.
Бұл ақша бірінші кезекте балалардың футбол жабдықтарын алуға жұмсалды. Олардың ішінде түрлі құрал–жабдықтар, доптар, спорттық киімдер, жазғы және қысқы киетін киімдер, салтанатты жиындарда киетін киімдер, жаттығуда киетіндер бар. Бір сөзбен айтқанда жалпы алынған заттардың бір балаға 20 данадан астам түрі бар. Күні кеше "Тараз" және "Ақтөбе" командалары арасындағы матч кезінде бұл заттарды клуб президенті, облыстық мәслихат депутаты Махамбет Дүйсембаев жасөспірімдерге өз қолымен табыс етті.
| № | Команда | И | М | О |
|---|---|---|---|---|
| 1 | Тобыл | 6 | 10-5 | 12 |
| 2 | Ақтөбе | 6 | 12-6 | 11 |
| 3 | Астана | 7 | 9-5 | 11 |
| 4 | Елимай | 6 | 7-6 | 11 |
| 5 | Қайрат | 7 | 6-6 | 11 |
| 6 | Жетісу | 6 | 4-4 | 10 |
| 7 | Ордабасы | 6 | 10-5 | 9 |
| 8 | Қызылжар | 7 | 9-6 | 8 |
| 9 | Атырау | 6 | 5-5 | 7 |
| 10 | Туран | 7 | 3-6 | 7 |
| 11 | Женис | 7 | 4-12 | 7 |
| 12 | Қайсар | 6 | 3-8 | 5 |
| 13 | Шахтер | 6 | 1-9 | 4 |
