Қазақстан әйелдер құрамасы Израиль құрамасын жеңді

Бірнеше минуттан соң Мария Яловаға жақсы пас тасталған еді, алайда қонақтардың қорғаушылары біздің шабуылшының алдын орап кетті. Жасыл алаңдағы тартыста екі жақтың футболшылары да есе жібермеуге тырысты. Дегенмен, Израиль футболшылары қақпаға допты жиі бағыттады.

Ал, Әйгерім Әйтімованың көтерген айып добын Израиль қақпасшысы уысынан шығармай, қағып алды. Екі ұжым алма-кезек шабуыл жасағанымен, еш нәтиже бермеді. Мария Ялова ойынды өз қолына алуға тырысты, алайда оның соңғы соққы жасауына еш мүмкіндік болмады. Оңтайлы сәтте шабуылға араласқан Светлана Бортникова ойыннан тыс қалды.

Израиль футболшылары біздің қақпаның алдында қауіпті сәттер ұйымдастыруға тырысқанымен, Қазақстан құрамасының қақпашысы Ирина Саратовцева сенімді ойнады. Қонақтардың капитаны Адва Твиль бағыттаған соқылар да нысанаға жетпеді.

Біздің футболшылар бұрыштама добынан кейін есеп ашуға ұмтылған еді. Алайда, Израиль қақпашысы қателікке бой алдырмады. Командалар бірнеше шабуыл ұйымдастырғанымен үзіліске дейін есеп өзгермеді.

Екінші тайм Израиль футболшыларының белсенді қимылдарымен басталды. Алайда, олардың әректтерінен түк шықпады. Калоян Петков шәкірттері де қарымта шабуылға иек артқанымен, қарсыластың қорғанысын бұза алмады. Израиль қорғаушылары Мария Ялованың жасыл алаңда көсілуіне жол бермеді. Камила Құлмағамбетова шабуылға жиі араласқанымен, қақпаға тура соққы бағыттай алмады.

Кезекті шабуылдардың бірінде қонақтардың ойыншысы Мария Яловаға қарсы өте дөрекі ойнады. Айып соққысын орындаған Камила Құлмағамбетова есеп аша алмады. Сәл уақыттан кейін қақпашымен бетпе-бет шыққан Светлана Бортникова тағы да ойыннан тыс қалды. Матчтың 65 минутында Қазақстан құрамасының бас бапкері ойыншы ауыстырды. Ксения Хайрулинаның орнына Тоғжан Бекпенбет алаңға шықты.

Осы сәтте қонақтар қарымта шабуыл ұйымдастырды. Ли Сима Фалкон біздің қақпашымен  жеке-дара шыққанымен мүмкіндікті мүлт жіберді. Кейін Израиль құрамасының жаттықтырушылары ойыншы алмастырды. Шай Перл жасыл алаңда Моран Фридманның орнын басты.

Кездесудің 69 минутында Мария Ялова қарсыласынан сытылып өтіп, қорғаушыны алдап, қақпаға әдемі соққы бағыттады! Қазақстан құрамасы 1:0 есебімен алға шықты. Бұл жанкүйерлер ұзақ күткен сәт еді.  Біздің футболшылар осы екпінмен екінші шабуыл жасады. Алайда, Юлия Николаенко ойын қаһарманы бола алмады.

Израиль футболшылары таразы басын теңестіруге ұмтылды. Алайда, олар Ирина Саратовцева қорғаған қақпаның осал тұсын таба алмады.  Ойынның соңғы минуттарында біздің құраманың бас бапкері Мария Ялованың орнына Евгения Хацкевичті шығарды. Тағы бірнеше минуттан кейін  Камила Құлмағамбетованы Әселхан Тұрлыбекова ауыстырды.

Төреші ойынның негізгі уақытына үш минут қосты. Қосымша уақыт аяқталғаннан кейін Қазақстан құрамасы жеңісті тойлады. Қорытынды есеп - 1:0.

Матч соңындағы баспасөз мәслихатында Қазақстан Ұлттық құрамасының бас бапкері Калоян Петков тәжірибелі ойыншылардың еңбегін атап өтіп, жас футболшыларды да мақтай түсті:

- Бүгін алаңға негізгі құрамның алты ойыншысы шыққан жоқ. Олар әртүрлі жарқаттарға байланысты ойынға қосыла алмады. Кейбіреуінің ескерту қағаздары болды. Дегенмен, жас футболшылар өздерін көрсетіп, жақсы нәтижеге қол жеткіздік. Голды ең тәжірибелі футболшы Мария Ялова соқты. Ол ерлік жасағанын айтқым келеді. Бірнеше күн бұрын әкесінен айырылғанына қарамастан, ойынға қатысып, бізге жеңіс әкелді. Ойынның өзіне келсек, қателіктер көп болды. Алайда, біз маңызды жеңіске жеттік. Дәл қазір бізге рейтингтік ұпайлар керек. Бұл жеңіс бірнеше орынға көтерілуге мүмкіндік береді. 

02.06.2016, Шымкент

Әйелдер арасында 2017 жылғы Еуропа Чемпионатының іріктеу турнирі

Қазақстан – Израиль - 1:0 (0:0)

Гол: Ялова 69

Қазақстан: Саратовцева И., Цеван Е., Демидова М., Құлмағамбетова К., Красюкова Е., Ялова М., Бортникова С., Николаенко Ю., Әйтімова А., Хайрулина К., Вильданова А.

Израиль: Шамир М., Равиц М., Бар О., Софер Д., Твиль А., Фалкон Л., Фридман М., Саде Ш., Баркюй М., Сендел К., Шахаф А.

ҚФФ