"Ақтөбе" ресейлік командаға айналып бара жатқан жоқ па?

Осы бір жағдайдан кейін іштей құлазып қалдық. Негізі еліміздегі ең мықты, қазақи жанкүйерлер "Ақтөбеде" ғой. Бірақ, осы жанкүйерлерді команда басшылары менсінбей жатыр. Былайша айтқанда, жанкүйерлердің жан-айқайын команда басшылары қыстырып жатқан жоқ. Осы жағдайдан соң "Ақтөбе" ресейлік командаға айналып кеткен жоқ па?», - деген ой сап ете қалды.

Негізі "Ақтөбе" былтырғы маусымның өзінде ресейліктердің сынақ орнына айналып кетті. Естеріңізде шығар, Владимир Газзаев келгеннен кейін командаға ресейлік футболшылар бірінің артынан бірі келе бастады. Тіпті, былтыр командаға Ресейден баспасөз қызметкерін де шақырамыз деген мәлімет шықты. Абырой болғанда, бұл облыстан да жұмысты жүргізе алатын маман табылып, клубтың баспасөз қызметін өз қолына алды. 

Биыл Газзаев орнынан кеткеннен кейін жағдай дұрысталатын шығар деп едік. Бірақ, үмітіміз су сепкендей басылды. Клуб басшылары өткен жылдың қазан айында бүкіл клубтың басшылығын ресейлік Дмитрий Васильевке бере салды. Бар былық осы жерден басталды.

Клубқа келіп, басшылардың құлағын бұрап алған соң, Дмитрий Пантелеевич "Ақтөбені" өз отандастарының ордасына айналдырды. Юрий Уткульбаев деген бапкерді шақырды. Оның артынан еріп футболшылар да келді. Қазір команданың негізгі құрамында ойнайтын футболшылардың көбі ресейліктер. Жоғары деңгейдегі ойыншылар болса мейлі екен. Екінші сорттағы ойыншылар. Өзіміздің ойыншылардан тек Дидар Жалмұқан ғана ойнап жүр.

Содан соң директор қазақ журналистеріне шабуыл жасады. Кімді, не үшін екені белгісіз "жау" қылып тастады. Ал, кешегі тірлігі шектен шығып кетті. Шыдамның да шегі бар деп жайдан-жай айтпаған атам қазақ. Кеше "Ақтөбе" жанкүйерлерінің шыдамы шектен шығып, команданы әуежайдан күтіп алды. Дегенмен, әуежайдан аяқдопшылар мен клуб басшылары бірден тым-тырақай болып кетіп қалған.

Жанкүйерлер директордың ізінен қалмай базаға дейін барған. Кездесіпті. Сөйлесіпті. Біз ол жерде болмадық. Тек видеодан көрдік. Дауысының дірілі тым қатты. Тағы да міз бақпайды жарықтық. Кейбір басылымдардың жазуынша, жанкүйерлерге былапыт сөз де айтыпты.

Пантелеевич барлық шектен шығып кеткен сияқты. Бұл азамат клубты толық ресейліктерге толтырмағанынша командадан кеткені дұрыс секілді. Айтпақшы, сол жиында ол – "Венгрлерден өтпей, бірінші алтылыққа енбесек қызметімнен кетемін", - депті. Енді оның қызметінен кетуі үшін амал жоқ "Ақтөбе" командасына мысық тілеу болайын деп тұрған түріміз бар ... Әйтпесе, команда алдағы уақытта толық орыстанып, Қазақстан ең бір мықты футбол қаласынан айырылып қалуы мүмкін. 

Уалихан ҚОСАНБАЙ