Марат Хайруллин: "Тәртіпті бақылау комитеті маған қатысты қатал жаза шығарды деп ойлаймын"

— Марат, "Ертіс" клубына қарсы кездесуде алған қызыл қағаздан кейін Сіз алдағы екі ойыннан шеттетілдіңіз. Тәртіпті бақылау комитетінің бұл шешімімен келісесіз бе?

— Тәртіпті бақылау комитеті маған қатысты қатал жаза шығарды деп ойлаймын. Негізі ол жерде менің тәртіпті бұзғаным қызыл қағазға сұранып тұрған жоқ. Бірақ, төреші мені алаңнан қууды жөн санады. Бір матчқа қатыспайтын шығармын деп ойлағанмын. Алайда, комитет екі матчқа шеттетіп отыр. Амал жоқ, келісемін.

— Бұл шешімге байланысты шағым түсірмейсіздер ме?

— Бұл менің құзырлығымдағы дүние емес. Шағымды клуб түсіреді. Менің білуімше, клуб арыз берген жоқ.

— Команда туралы айтып берсеңіз. Бірінші айналымда "Оқжетпес" жақсы ойнаған еді. Екінші айналымда команда ойыны көңілден шығып тұрған жоқ. Қатарынан үш ойында жеңілдіңіздер. Командаға не болды?

— Бұл сұраққа дәл жауап бере алмаймын. Қазір командаға не болғанын Владимир Мухановтың өзі де білмей жатыр. Жігіттер психологиялық дағдарысқа ұшыраған секілді.

— Маусым басында Сіздерге: "Бірінші алтылыққа кіру", - деген тапсырма қойылған еді. Сол тапсырма орындалғаннан кейін босаңсып кетпедіңіздер ме?

— Басқа жігіттер үшін жауап бере алмаймын, мен өзім босаңсыған жоқпын. Қазақстанда оныншы маусымымды өткізіп жатырмын ғой. Ешқашан өз ісіме немқұрайлы қараған емеспін. Иә, қазір біздің ойынымыз керемет емес. Мойындаймын. Жігіттер физикалық, психологиялық дағдарыста. Бұл кезеңнен де өтіп, жеңісті жолымызды жалғастырамыз деген ойдамын.

— Екінші айналымның басында "Оқжетпес" қола жүлденің басты үміткері еді. Қазір жағдай қиындап қалды. Командаңыз үшінші орын ала алады дегенге өзіңіз сенесіз бе?

— Әрине. Бізде алда әлі бес ойын бар. Сол ойындардың барлығында жақсы нәтиже көрсету керекпіз. Сонда қола жүлде бізге бұйырады.

Уалихан Қосанбай