Алаң сыртындағы айқас

Пайперстің жазасы

Қазақстан футболы УЕФА құрамына өткеннен кейін ел футболында тәртіп орнай бастағандай болды. Ұлттық құрамамызға шет елден бапкерлер келді. Соның бірі болған голландиялық маман Арно Пайперс тәртіп жағынан жаңашылдық әкелді. Жаттығу, жиындарға кешігіп келген ойыншыларды жазалаудың еуропалық үлгісін көрсетті. Мысалы жаттығуға кешігіп келген ойыншы барлық команда мүшелеріне жететін торт алып келуге тиіс болған немесе киноға билет сатып алуы тиіс. Осындай жағдайға тап болған Сергей Ларин бірнеше торт сатып әкеліп, әбден әлекке түскен. Нәтижесінде келер жолы жаттығуға ертерек келуге тырысады!

Кешкі серуен

Осыдан бірнеше жыл бұрын оңтүстік аймақтағы клубтарымызда өзбекстандық легионерлер қаптап жүретін. Қазақ футболына ойындары үйлесетін, әрі арзан тұратын ойыншыларды шымкенттік, тараздық, қызылордалық клубтар көбірек пайдаланатын. Солардың бірі шабуылшы Ділмұрат Назаров «Тараз» сапында ойнап жүрген кезінде тәртіпсіздігімен көзге түседі. Қала ішіндегі ресторандардың бірінде кешқұрымдатып серігіп отырған аяқдопшының үстінен клуб басшылары келіп түседі. Бейресми ақпарат көздерінің айтуынша өзбекстандық легионердің алкогольдік сусыннан ұрттап отырғаны сол жерде басшыларға мәлім болған. Содан кейін Назаров клубтан кетуге мәжбүр болады.

Туған күннің «тірлігі»

Қазақстан Ұлттық құрамасының белді ойыншыларының бірі болған Дмитрий Бяков Пайперс бастаған құрама сапында үнемі гол соғып, іріктеу кезеңі кезінде барша Еуропадағы топтардың ішінде бес гол соғып, мергендер көшінде жүреді. Ал, сол ойыншының туған күнін қалай тойлағанын ұлттық құраманың көп жанкүйері біле бермеуі де мүмкін. Алматының мықты бір түнгі клубында ішімдіктен ұрттап, достарының ортасында жақсы кеш өткізіп отырған Дмитрий кенеттен шыққан жанжал нәтижесінде белгісіз біреумен ерегіседі. «Жынды судан» ұрттағаннан кейін іс оңсын ба? Әлгі белгісіз біреу Дмитрийдің жүрек түбінен пышақ сұғып қашады. Одан кейін Бяков үлкен спортпен қош айтысатын шығар деп жүргенде олай бола қоймады. Бойында қайсарлығы мен күш-қуаты бар жартылай қорғаушы футболға қайта оралды.

Жүгі ауыр жейделер

2001 жылдың тамыз айы. Бойы 2 метр 10 см Ян Коллер алаңда ерекше орын алып жүретін ойыншының бірі. Чехия құрама командасында жемісті өнер көрсеткен ол іріктеу кезеңіндегі ойында тәртіпсіздік жасап, бас бапкердің шешімімен командадан шығарылды. «Боруссия» шабуылшысы Солтүстік Ирландия командасына қарсы кездесуде бапкердің оны басқа ойыншыға алмастырып жібергеніне наразы болғандығы сонша үстіндегі жейдені шешіп, аяғымен теуіп жібереді. Оны көрген бас бапкер Йозеф Хованец Чехияның елтаңбасы бар ұлттық құраманың жейдесін аяққа таптадың деп бас командадан қудалайды. Дәл осындай жағдайға Ресейдің белгілі ойыншысы Юрий Жирков та ұшыраған. Жастар арасындағы кездесуде Ресейдің елтаңбасы бар жейдені жерге лақтыра салып, төрешіге наразы екендігіні білдіртеді. Осы жағдайдың артынша оны футбол федерациясы айыппұл төлеткізіп, кешірім сұратады.

Жарнаманың желігі

2001 жылдың қаңтар айы. Норвегия футбол қауымдастығы «Манчестер Юнайтед» шабуылшысы Оле-Гуннар Солскьяерді ұлттық құрама ойындарында шақыртпағанды жөн санады. Себебі, ол Норвегия командасына демеушілік танытып отырған компанияның жарнамасына түсуден бас тартады. Норвегияда Сульшердің (футбол әлемінде оны осылай атап кеткен) танымалдығы өте керемет. Оны тіптен әлемнің көп елдерінде таниды. Кезінде «МЮ» сапында талай голдар соққан адуынды шабуылшы. 1998/1999 жылғы атышулы Чемпиондар Лигасының финалында соңғы үш минутта «Бавария» қақпасына жеңісті голды ойынға кіре сала соққан осы Сульшер еді. Сэр Алекс Фергюссон өзінің автобиографиялық кітабында Сульшерге арнап бір бөлім жазған.

Ермұхамед МӘУЛЕН